Brukseli lëshon “kamxhikun diplomatik” mbi qeverinë, ambasadorja Sousa dënon dhunën ndaj protestuesve dhe i kërkon Ramës të dëgjojë shqetësimet e qytetarëve, ja ultimatumi i rreptë i BE që shemb fasadën e pushtetit
31 Tetor 2026
Ambasadorja Sousa dënon dhunën ndaj protestuesve dhe i kërkon Ramës të dëgjojë shqetësimet e qytetarëve, ja ultimatumi i rreptë i BE që shemb fasadën e pushtetit.
Brukseli ka vendosur të heqë dorezat e mëndafshta dhe të fusë në punë “kamxhikun diplomatik”, duke lëshuar një goditje të drejtpërdrejtë ndaj kupolës në pushtet. Përmes një qëndrimi pa ekuivok, ambasadorja e Bashkimit Evropian në Tiranë, Sofia Moreira de Sousa, ka zbërthyer fasadën e pushtetit duke u bërë me dije se dhuna ndaj qytetarëve dhe injorimi i revoltës popullore nuk mund të ambalazhohen më si “normë demokratike”.
Sipas diplomates së lartë, përgjegjësia kryesore bie mbi politikanët dhe institucionet, të cilat duhet urgjentisht të rrisin kapacitetet për të dëgjuar dhe adresuar pakënaqësitë e njerëzve në vend që të fshihen pas arrogancës. Ky ultimatum nga BE-ja nxjerr zbuluar braktisjen e parimeve të shtetit të së drejtës dhe i kujton Ramës se përplasja me qytetarët nuk zgjidhet me forcë në rrugë.
Deklarata përbën një paralajmërim të qartë se demokracia pa institucione funksionale dhe pa llogaridhënie përballë popullit mbetet thjesht një shfaqje me letra me ngjyra. Në këtë mënyrë, me “kamxhik” në njërin krah e leksion demokratik në tjetrin, Brukseli po e vendos pushtetin përballë përgjegjësisë së vetme: të dëgjojë zërin e qytetarëve përpara se kriza të bëhet e pashmangshme.
Pjesë nga deklarata e ambasadores Sofia Moreira de Sousa
“Në Shqipëri dhe në disa vende të Europës po shohim protesta të dhunshme. Kjo nuk mund të ndodhë në demokraci dhe nuk duhet të ndodhë në vendet ku ne mbrojmë demokracinë. Nuk duhet të ketë dhunë në rrugë. Pakënaqësitë e qytetarëve duhet të adresohen në institucionet demokratike. Nga ana tjetër, institucionet duhet të kenë kapacitetet e duhura për të treguar se mund t’i trajtojnë pakënaqësitë e qytetarëve.
Pra, kjo është një punë e madhe që duhet të bëjnë politikanët dhe nëpunësit civilë, për të forcuar kapacitetet e institucioneve në adresimin e këtyre pakënaqësive. Ne nuk e shohim këtë te dhuna që po përshkallëzohet. Duhet të angazhohemi me rininë, shoqërinë civile dhe çdo qytetar, për t’u shpjeguar rregullat e lojës në demokraci. Këto rregulla nuk kanë të bëjnë me shkatërrimin e pasurisë publike dhe private, por me forcimin e ligjeve dhe rregullave që mundësojnë adresimin e pakënaqësive.
Ka vende të caktuara ku njerëzit duhet të luftojnë për atë që besojnë dhe këto vende janë institucionet”, deklaroi ambasadorja e Bashkimit Evropian në vendin tonë, Sofia Moreira de Sousa. Ndërkohë kujtojmë se qëndrimin e saj ambasadorja e shprehu gjatë takimit të katërt të Komitetit të Përbashkët Konsultativ CoR-Shqipëri, të zhvilluar në Elbasan, ku përveç procesit të integrimit europian u diskutuan edhe zhvillimet e fundit politike në vend.